Хүүхдээ өсгөхөд дасан зохицох нь

Нөхөр/хамтрагчтайгаа эе эвтэй, харилцаа сайтай байх нь шинэхэн эцэг эхийн үүрэгтээ амжилттай дасан зохицох хамгийн чухал түлхүүр юм. Хүүхдээ өсгөхөд эцэг, эх өөр өөрсдийн гэсэн өвөрмөц арга барилаар хандаж болох бөгөөд энэ үед аль болох нэг нэгнээ ойлгон дэмжихийг хичээх нь чухал. Учир нь та хоёр, хоёулаа шинэ үүрэгт суралцаж байгаа шүү дээ.

Хосоороо хоёулхнаа байх тогтмол цаг гаргахыг эрмэлзэх нь зүйтэй. Ингэснээр дотно холбоогоо хадгалж чадах боломжтой. Нялх хүүхэдтэй үед нэг, нэгэндээ цаг гаргана гэдэг бүтэхгүй мэт санагдаж болох хэдий ч энэ нь өдөрт ердөө 15-хан минутын аминчхан яриа ч байж болно.

Бид Юу Бодож Байсан Бэ? буюу The What Were We Thinking? эцэг эхчүүдэд зориулсан хөтөлбөрөөс хоорондоо хэрхэн яриа эхлүүлэх талаар About Mums and Dads Worksheets хүснэгтээс мэдээлэл авах боломжтой .

http://www.whatwerewethinking.org.au/

Өөрийн хийж чадах зүйлсээ төлөвлөн дэс дараанд оруулах нь тустай хэдий ч төлөвлөгөө тань бодит байдалтай нийцсэн байх нь чухал. Та бүх зүйлийг амжуулна гэвэл хэцүү шүү дээ. Заримдаа хүүхэд өвдөж болно, эсвэл яг гэрээс гарах болоход живхийг нь солих хэрэгтэй ч болж болно. Юу ч тохиолдож болно. Тиймээс та өөртөө болон гэр бүлийнхэндээ зөөлөн хандаарай.

Зарим соёлд төрсөн эмэгтэй гэрээс аль болох гарахгүй байхыг зөвлөдөг. Энэ тохиолдолд, эхний хэдэн сард бусдаас тусламж, дэмжлэг авах боломж байгаа бол авах нь тустай. Үүнд гэр бүлийнхэн, найзууд, хөршүүд, ээжүүдийн бүлгэмүүд, соёлын бүлгэмүүд багтахаас гадна алс хол байгаа гэр бүлийнхэнтэйгээ тогтмол холбогдон ярих зэргээр бусдаас дэм авч болно. Нөхөр/хамтрагч болон гэр бүлийнхээсээ дэлгүүрээс худалдан авалт хийх, хоол хүнс бэлтгэх, гэр орон цэвэрлэх болон угаалга хийх зэрэгт тусламж хүсч болно. 

Хоол хүнс, гэр орны ажил, дэлгүүрээс худалдан авалт хийх, эсвэл түр амсхийх, усанд орох цаг гаргах зэрэг олон зүйлст бусдын санал болгосон тусыг авахад гэмгүй. Мөн та өөрөө ч бусдаас тусламж хүсч болно. 

Бусад эцэг, эхчүүдтэй танилцаж, нөхөрлөх нь олон талын ач холбогдолтой. Та тэдэнтэй ярилцаж, инээлдэж, юм үзэж, мөн хүүхдээ хэрхэн өсгөх, эцэг эх байхад хэрхэн суралцаж байгаа туршлагаа солилцон, бие биесээсээ суралцах боломжтой.

Ганцаардах нь танд болоод таны хүүхдэд таагүй нөлөөтэй байдаг.

The Raising Children Network-с насанд хүрэгчдэд зориулсан эцэг, эх байхад хэрхэн суралцах талаар өндөр ач холбогдол бүхий дүрс бичлэгүүдийг сонгон хүргэснийг дараах холбоосоор орж үзнэ үү.

https://raisingchildren.net.au/grown-ups/videos

Сүүлийн 40 жилийн хугацаанд эцгийн үүрэг маш ихээр өөрчлөгдсөн ба бусад аавуудаас дэмжлэг хүсэх нь аавуудын хувьд тустай байдаг.

Сайн Аавууд буюу The Better Dads вэбсайтнаас хэрэгтэй мэдээлэл олох боломжтой. http://betterdads.com/ 

Олон хүүхэд төрүүлэх, хүүхэд хөгжлийн бэрхшээлтэй байх эсвэл танд өөрт тань эрүүл мэндийн асуудлууд байх нь бас нэмэлт ачаалал үүсгэх шалтгаан болж болно.

Эдгээр нөхцөлд зориулсан тусгай үйлчилгээнүүд байдаг бөгөөд тэдгээрээс аль болох ашиглахыг зөвлөж байна. Хамгийн чухал зүйл бол таны болоод таны хүүхдийн сэтгэцийн эрүүл мэнд ба энх тунх байдал юм.

Нүүр хуудас дахь чухал холбоо барих жагсаалтаас авч болох дэмжлэг, нэмэлт тусламж, үйлчилгээнүүдийн талаарх мэдээллийг харна уу. 

Хүүхдээ унтсан үед нь аль болох дагаж унтахыг хичээгээрэй.